AI бүх кодыг бичиж эхэлсэн эрин: Amazon инженерүүдийнхээ ажлын дүрмийг сууриар нь шинэчиллээ

Хиймэл оюуны кодинг агентууд программ хангамж хөгжүүлэлтийн салбарыг эргэлт буцалтгүй өөрчилж буй энэ үед дэлхийн технологийн хамгийн том тоглогчдын нэг Amazon өөрийн инженерүүдийн дүрэм журам, үүрэг хариуцлагын зааварчилгааг (Software Engineering Role Guidelines) сууриар нь шинэчлэн зарлалаа.

Өмнө нь хөгжүүлэгчийн ур чадварыг бичсэн кодын хэмжээ, шийдсэн таскийн хурдаар хэмждэг байсан бол шинэ удирдамжаар энэ ойлголтыг бүрэн халж байна. Өнөөдөр Amazon-ий дотоод системийн кодын дийлэнхийг хиймэл оюун бие даан бичиж эхэлсэн тул инженерийн үндсэн үүрэг нь "код бичигч"-ээс "системийн архитектор, чанарын хянагч" болж өөрчлөгдсөнийг удирдлагууд нь албан ёсоор хүлээн зөвшөөрөв.

"Код бичих биш, хэрэглэгчид хүрэх үр дүн чухал"

AWS-ийн Дэд ерөнхийлөгч бөгөөд нэрт инженер (Distinguished Engineer) Марк Брүүкер (Marc Brooker), Amazon Stores-ийн Дэд ерөнхийлөгч Майкл "Терк" Терковиц (Michael Terkowitz) нарын инженерүүддээ илгээсэн захидалд шинэ эриний инженерийн зарчмыг тодорхой заажээ.

Шинэчилсэн удирдамжийн гол санаанууд:

1. AI ашигласан байдал нь амжилтын хэмжүүр биш: Инженерийг "хэр их хиймэл оюун ашиглав" эсвэл "хэдэн мянган мөр код үйлдвэрлэв" гэдгээр нь дүгнэхгүй. Хамгийн гол хэмжүүр нь систем найдвартай ажиллаж, хэрэглэгчийн бодит асуудлыг хэр оновчтой шийдсэн бэ гэдэгт төвлөрнө.
2. Шаардлагагүй бол AI-г хүчээр бүү ашигла: Захидалд маш тодорхойгоор: "Хэрэв таны ажилд өнөөгийн AI хэрэгслүүд бодитой үр дүн өгөхгүй байгаа бол түүнийгээ үндэслэлтэйгээр тайлбарлаж чадаж л байвал AI ашиглахгүй байх нь бүрэн хүлээн зөвшөөрөгдөх зүйл" хэмээн дурджээ. Энэ нь загвар хөөцөлдөж хаа сайгүй хиймэл оюун шахах бус, бодит практикт нийцсэн шийдэл гаргахыг шаардаж буй хэрэг юм.
3. Essential Complexity буюу суурь логик руу шилжих: Хөгжүүлэгчийн цаг зав syntax алдаа хайх, давтагдсан логик бичихэд бус, системийн өргөтгөх боломж, өгөгдлийн урсгал, бизнесийн суурь эрсдэлийг тооцоолоход зарцуулагдах ёстой.

"Delete and Recreate": Үйлдвэрлэлийн орчинг сүйтгэсэн сургамж

Amazon ийм хатуу зааг тогтоох болсон нь хоосон онол биш, харин бодит үйлдвэрлэлийн (production) ослуудтай шууд холбоотой.

Өнгөрсөн хугацаанд AWS-ийн дотооддоо ашигладаг Kiro хэмээх автоном AI кодинг агенттай холбоотой ноцтой явдал гарсан юм. Инженерүүд AWS Cost Explorer системийн өчүүхэн алдааг засуулахаар Kiro агентад даалгавар өгөхөд уг агент тухайн асуудлыг дүгнээд хамгийн оновчтой гарц нь: "Орчныг бүхэлд нь устгаад, шинээр дахин үүсгэх (delete and recreate the environment)" гэж тооцоолжээ. Үүний уршгаар амьд production систем устгагдаж, бүс нутгийн хэрэглэгчдийн үйлчилгээ 13 цагийн турш тасалдсан гашуун сургамж бий.

Amazon энэ явдлыг "AI-ийн алдаа биш, харин хэт өндөр эрх олгосон хүний тохиргооны алдаа (user error)" гэж тайлбарласан ч үүний дараа үйлдвэрлэлийн бүх өөрчлөлтөд Mandatory Peer Review буюу ахлах инженер заавал баталгаажуулж шалгах дүрэм нэвтрүүлсэн билээ. Хэрэв хиймэл оюуны агент буруу шийдвэр гаргавал түүний хариуцлагыг уг агентыг хянаж чиглүүлж байсан хүн-инженер өөрөө 100% хүлээнэ гэдгийг тус журамд хатуу тусгасан байна.

"Velocity Labs" ба шинэ багийн соёл

Энэхүү шинэ бодлогын зэрэгцээ AWS дотор өмнө нь нууц байсан Velocity Labs нэртэй жижиг, шуурхай хөгжүүлэлтийн баг ажиллаж эхэлснийг Марк Брүүкер дэлгэлээ.

Сиэтлд байрлах 35 хүний бүрэлдэхүүнтэй тус баг нь Amazon-ийн уламжлалт хүнд суртлыг халж, нээлттэй эхийн шинэ загварыг санаа гарахаас нь эхлээд олон нийтэд цацах хүртэл ердөө нэг долоо хоног хүрэхгүй хугацаанд гүйцэтгэдэг байна. Тус багт судлаач-эрдэмтэд код бичиж, инженерүүд судалгаанд оролцон, гибрид хэлбэрээр ажиллаж байгаа нь ирээдүйн программ хангамжийн багийн бүтэц ямар байхыг харуулж буй хэрэг юм.

Хөгжүүлэгчдэд өгөх дохио

Amazon-ийн энэхүү алхам дэлхийн нийт програм хангамжийн салбарт тодорхой нэг дохиог өглөө: Код бичдэг гар байх нь таныг хамгаалахгүй, харин системийн найдвартай байдлыг хамгаалдаг ухаан таны үнэ цэнийг тодорхойлно.

Хөгжүүлэгчдийн анхаарах 3 үндсэн дүгнэлт:

• Prompt бичих нь инженерчлэл биш: Агентаар код бичүүлэх нь амархан ч түүний үүсгэсэн архитектурын гажиг, аюулгүй байдлын цоорхойг илрүүлэх чадвар хамгийн чухалд тооцогдоно.
• Human-in-the-Loop бол үүрэг хариуцлага: Production систем рүү чиглэсэн ямар ч AI үйлдэлд "Автомат" итгэл хүлээлгэж болохгүй. Баталгаажуулалт (verification) нь кодингоос ч илүү үнэтэй ур чадвар болж байна.
• Багаж хэрэгслийн боол бүү бол: AI ашиглах нь таны давуу тал байж болох ч, зорилго нь хэзээд бизнес болон хэрэглэгчийн асуудлыг найдвартай шийдэхэд оршино.

Эх сурвалж: GeekWire, AWS Engineering Reports