Amazon инженерүүдийн "Tokenmaxxing"-ийг шүүмжлэв: AI эрин үеийн "Сэргэн мандалтын инженер" гэж хэн бэ?

Сүүлийн хоёр жилд хиймэл оюуны код бичих хэрэгслүүд (AI coding assistants & agents) програм хангамж хөгжүүлэлтийн салбарыг үндсээр нь өөрчиллөө. Гэвч хэрэгсэл сайжрахын хэрээр багуудын дунд нэгэн гажуудал үүссэн нь "AI хэрэглэж байгаа л бол бүтээмжтэй байна" гэх хуурамч ойлголт юм.

Дэлхийн хамгийн том технологийн аваргуудын нэг Amazon энэ асуудлыг албан ёсоор хөндөж, өөрийн бүх програм хангамжийн инженерүүд (SDE) болон менежерүүддээ зориулан хөгжүүлэгчийн үүргийн шинэчилсэн удирдамжийг нийтэллээ. Тус баримт бичигт хиймэл оюуны токеныг шаардлагагүйгээр хэтрүүлэн ашиглаж, бүтээмжтэй харагдахыг оролддог "Tokenmaxxing" үзэгдлийг хатуу анхааруулсан байна.

Гудхартын хууль ба "Tokenmaxxing" гэж юу вэ?

Эдийн засаг, социологийн салбарт "Аливаа хэмжүүр нь өөрөө зорилго болох мөчид сайн хэмжүүр байхаа больдог" гэх Гудхартын хууль бий. Amazon-д яг энэ үзэгдэл давтагджээ.

Amazon Stores-ийн дэд ерөнхийлөгч бөгөөд Distinguished Engineer Терк Терковицын (Terk Terkowitz) бичсэн албан санамжид дурдсанаар, зарим инженерүүд болон багууд өөрсдийн гүйцэтгэлийг үнэлүүлэхийн тулд LLM ашиглалтын үзүүлэлтээ хиймлээр өсгөж эхэлсэн байна. Өөрөөр хэлбэл, энгийн алгоритмаар шийдэж болох асуудал дээр олон сая токен зарцуулж агент ажиллуулах, хэдэн арван мянган мөр AI код үүсгэх явдлыг "Tokenmaxxing" хэмээн нэрлэжээ.

Энэ нь тус компанийн гол баримталдаг Frugality (Хэмнэлттэй байх) болон Invent and Simplify (Шинийг санаачилж, хялбарчлах) зарчмуудтай шууд зөрчилдөж байна. AI ашигласан хэмжээ, зарцуулсан токен эсвэл өөрчилсөн кодын мөр (Lines of Code) зэрэг хэмжүүрүүд нь бизнесийн бодит үнэ цэнээс тасарсан "маш учир дутагдалтай хэмжүүрүүд" гэдгийг удирдлагууд цохон тэмдэглэв.

"Kirorank"-ийн сургамж ба төсвийн дарамт

Энэхүү сануулга гэнэт гарч ирээгүй юм. 2026 оны эхээр Amazon-ийн инженерүүд дотооддоо AI хэрэгслийн ашиглалтыг эрэмбэлдэг "Kirorank" нэртэй албан бус лидерборд үүсгэсэн бөгөөд үр дүнд нь ажилтнууд чансаагаа ахиулахын тулд утга учиргүй даалгавруудад AI агентуудыг ажиллуулан, тооцоолох зардлыг огцом өсгөсөн тул уг системийн ажиллагааг зогсоож байжээ.

Байгууллагын түвшинд AI хэрэгслийн эрхийг хязгааргүй олгосноос болж зарим томоохон компаниуд сарын дотор хэдэн зуун сая ам.долларын токен төлбөрт унасан жишээнүүд ч бий. Үүнээс гадна Shopify-ийн гүйцэтгэх захирал Тоби Лүтке (Tobi Lütke) саяхан AI-аар үүсгэсэн чанаргүй, шалгаагүй кодоор Pull Request-ийг бөмбөгдөж, хамтран ажиллагсдынхаа цагийг үрдэг хандлагыг "slop grenades" хэмээн тодорхойлж байв.

"Renaissance Developer": AI ашиглахгүй байх нь заримдаа хамгийн зөв шийдэл

Amazon энэхүү шинэчлэлтээрээ инженерүүдийг AI ашиглахыг хориглоогүй бөгөөд харин ч хиймэл оюун цаашид хөгжүүлэлтийн төвд байх болно гэдгийг онцолсон. Гэхдээ хөгжүүлэгчийн тодорхойлолтыг цоо шинэ түвшинд гаргаж, тэднийг "Renaissance Developer" (Сэргэн мандалтын үеийн хөгжүүлэгч) болохыг уриалж байна.

Сэргэн мандалтын үеийн инженер гэдэг нь:

AI хэрэгслүүдийг хүний шүүмжлэлт сэтгэлгээ (human judgment), системийн архитектурын гүн ойлголттой хослуулдаг.
Хэзээ AI ашиглах, хэзээ ашиглахгүй байхаа мэддэг.

Удирдамжийн хамгийн анхаарал татсан өгүүлбэр бол:

"Хэрэв таны ажиллаж буй систем эсвэл даалгаварт одоогийн AI хэрэгслүүд ашиг тусаа өгөхгүй байгаа бол энэ нь таны алдаа (failing) биш, харин маш үнэ цэнтэй ололт/дүгнэлт (finding) юм. Хаана AI тус болж чадахгүй байгааг үндэслэлтэй тайлбарлаж чадаж буй инженер бол бидний шаардаж буй эрүүл сэтгэлгээг бодитоор харуулж байна."

Бүтээмжийг цаашид юугаар хэмжих вэ?

AWS-ийн дэд ерөнхийлөгч Марк Брүүкер (Marc Brooker)-ийн тайлбарласнаар, хөгжүүлэгчийн бүтээмжийг хичнээн token үрсэн эсвэл хэдэн мянган мөр PR нээснээр хэмжихгүй.

Үүний оронд:

Feature Velocity: Хэрэглэгчийн үнэ цэнтэй функцууд prod орчинд хэр хурдан, найдвартай гарч байна вэ?
System Reliability: Гарсан өөрчлөлтүүд алдаагүй, үйлдвэрлэлийн орчныг унагахгүй байж чадаж байна уу?
Architecture & Simplification: AI-ийн бичсэн хэт нүсэр, ойлгомжгүй кодоос илүү хүний гаргасан цэвэр, арчлахад хялбар шийдэл гарч чадаж байна уу?

DEVX Дүгнэлт

AI coding агентууд хөгжихийн хэрээр хамгийн өндөр ур чадвартай инженер гэдэг нь "хамгийн их prompt бичдэг" хүн биш, харин "системийн эцсийн үр дүн, логик зөв эсэхийг хянаж чаддаг" инженер болж хувирч байна.

Компаниуд AI-ийг зүгээр л баг хамт олондоо тулгаж, "хэн их AI ашиглав" гэдэг KPI тавихаа больж, бодит үр дүн, архитектурын тогтвортой байдалд анхаарах цаг ирснийг Amazon-ийн энэхүү шинэ бодлого тод харууллаа.

Эх сурвалж: CNBC, Tom's Hardware, Dealroom, Business Insider