Claude Code-ийн өргөтгөл халдлагад өртөж, хөгжүүлэгчдийн системд SSH Backdoor суулгажээ: Та өртсөн үү?

Кибер аюулгүй байдлын шинжээчид болон Cursor баг программ хангамжийн нийлүүлэлтийн сүлжээнд (supply chain attack) чиглэсэн ноцтой халдлагыг илрүүлснээ зарлалаа. Anthropic-ийн албан ёсны хөгжүүлж буй Claude Code хэрэгслийн Open VSX болон Cursor Marketplace дахь anthropic.claude-code өргөтгөлийн 2.1.313 хувилбарт хөгжүүлэгчийн компьютерт байнга байрших (persistent) SSH backdoor нуусан байсныг тогтоожээ.

Cursor-ийн мэдээлснээр уг хортой хувилбар зах зээл дээр ойролцоогоор 11 цаг байршсан бөгөөд 5,000 орчим хөгжүүлэгчийн төхөөрөмжид татагдсан байх магадлалтай байна. Хэдийгээр уг хувилбарыг бүх платформоос яаралтай устгаж, цэвэр 2.1.314 хувилбарыг гаргасан ч, уг хортой код хөгжүүлэгчийн системд өөрийн гэсэн ул мөр, түлхүүрүүдээ үлдээдэг тул өргөтгөлийг зүгээр л устгах (uninstall) нь эрсдэлийг арилгахгүй юм.

Халдлага хэрхэн ажилласан бэ? (Техник шинжилгээ)

Халдагчид хууль ёсны extension.js багцын хамгийн эхний хэсэгт 66 мөрийн бие даасан JavaScript loader-ийг IIFE (Immediately Invoked Function Expression) хэлбэрээр шигтгэсэн байна.

Уг хортой код нь дараах онцлогтой:

1. Идэвхжих нөхцөл: Хөгжүүлэгч Claude-тэй чатлаж, асуулт асуух ч шаардлагагүй. VS Code эсвэл Cursor асах, эсвэл өргөтгөлийн webview нээгдэх үед л шууд Node.js орчинд дуудагдаж ажиллана.
2. Сэжиг авхуулахгүй байх механизм: Хортой кодын бараг бүх мөрийг алдаа баригч try/catch дотор бичсэн тул алдаа гарсан ч ямар ч анхааруулга өгөхгүй, жинхэнэ Claude өргөтгөл цаанаа хэвийн үргэлжлүүлэн ажиллаж хөгжүүлэгчийн анхаарлыг татахгүй.
3. Тагнуулын үйлдэл (Reconnaissance): Ачаалагдсан даруйдаа төхөөрөмжийн нэр, одоогийн хэрэглэгчийн нэр, Git глобал имэйл хаяг (git config --global user.email), болон AWS, GCP, KEY, TOKEN, SECRET, PASS агуулсан 40 хүртэлх орчны хувьсагчийн (environment variables) нэрийг цуглуулж 8099 порт дээрх C2 сервер рүү (134.209.82.225) дамжуулдаг.

Backdoor ямар хор хөнөөл тарьсан бэ?

Энэхүү халдлагын гол зорилго нь хөгжүүлэгчийн төхөөрөмж дээр халдагч хүссэн үедээ алсаас нэвтрэх боломжийг бий болгох явдал байв:

• SSH Key суулгалт: Хөгжүүлэгчийн ~/.ssh/authorized_keys файлд халдагчийн Ed25519 public key-г нэмсэн. Түлхүүрийг системд суусан энгийн сервис мэт харагдуулахын тулд svc-telemetry гэсэн тайлбартайгаар байршуулжээ.
• Reverse SSH Tunnel: Төхөөрөмж галт хана (firewall) эсвэл NAT-ын ард байсан ч халдагчийн сервэрт шууд холбогдохын тулд далд private key үүсгэн гадагшаа чиглэсэн reverse tunnel нээхийг завддаг.
• Байнгын үлдэх механизм (Persistence): Систем унтарч ассан ч код ажиллахын тулд macOS дээр LaunchAgent (com.apple.sysmond.plist), Linux дээр crontab (@reboot), харин Windows дээр PowerShell-ээр Scheduled Task үүсгэсэн байна.

Хэдийгээр зарим үйлдлийн систем дээр SSH серверийг идэвхжүүлэхэд Root/Admin эрх шаардагдсаны улмаас туннел үүсгэх үйл явц тасалдсан тохиолдол байгаа ч халдагчийн түлхүүр системд байршиж, компьютерын ерөнхий мэдээлэл гадагш задарсан хэвээр байгааг Cursor анхааруулжээ.

Системээ шалгаж, цэвэрлэх заавар

Хэрэв та сүүлийн 24 цагийн дотор Cursor эсвэл Open VSX-тэй ажилладаг ямар нэг код засварлагч дээр anthropic.claude-code өргөтгөлийг шинэчилсэн эсвэл шинээр татаж суулгасан бол яаралтай дараах алхмуудыг хийнэ үү:

1. Систем халдварлагдсан эсэхийг шалгах

Терминал дээр дараах тушаалыг ажиллуулж шалгаарай:

# macOS болон Linux дээр:
grep svc-telemetry ~/.ssh/authorized_keys

Хэрэв Windows хэрэглэгч бол PowerShell дээр:

Select-String -Path "$HOME\.ssh\authorized_keys", "C:\ProgramData\ssh\administrators_authorized_keys" -Pattern "svc-telemetry"

Хэрэв тус командыг ажиллуулахад ямар нэг илэрц олдвол таны төхөөрөмж халдлагад өртсөн байна гэсэн үг.

2. Цэвэрлэх ба хамгаалах алхмууд

Зөвхөн өргөтгөлийг устгах нь системд суусан арын хаалгыг арилгахгүй тул дараахыг гүйцэтгэнэ:

• ~/.ssh/authorized_keys файлыг нээж svc-telemetry түлхүүр бүхий мөрийг бүрэн устгах.
• Түр зуурын сангуудаас .stk_* нэртэй түлхүүрийн файлууд байгаа эсэхийг шалгаж цэвэрлэх.
• macOS хэрэглэгчид ~/Library/LaunchAgents/ дотроос сэжигтэй plist файлууд (жишээ нь com.apple.sysmond.plist), Linux хэрэглэгчид crontab -l шалгаж сэжигтэй @reboot үйлдлийг арилгах.
• Галт ханан дээрээ 134.209.82.225 IP хаягийн 22 болон 8099 портын траффикийг бүрэн хаах.
• Нууц түлхүүрүүдээ шинэчлэх (Key Rotation): Хамгийн чухал нь, халдлагад өртсөн байж болзошгүй төхөөрөмж дээр хадгалагдаж байсан бүх SSH түлхүүр, API token (OpenAI, Anthropic), GitHub Personal Access Token болон Cloud үйлчилгээний (AWS, Google Cloud) access key-үүдээ нэн даруй цуцалж, шинээр үүсгээрэй.
• Claude Code өргөтгөлөө аюулгүй болсон 2.1.314 хувилбар руу шинэчлэх.

Хөгжүүлэгчдэд өгөх сургамж

Энэхүү халдлага нь сүүлийн үеийн программ хангамжийн аюулгүй байдлын асуудал энгийн нээлттэй эх бүхий сангуудаас (npm, PyPI) хальж, бидний өдөр тутам итгэж хэрэглэдэг IDE болон AI өргөтгөлүүдийн нийлүүлэлтийн суваг руу шилжиж байгааг санууллаа. Өргөтгөлүүдэд системийн түвшний зөвшөөрөл өгөхдөө хянуур хандах, чухал нууц түлхүүрүүдийг энгийн орчны хувьсагчид хадгалахаас зайлсхийж хамгаалалтын менежер (secret vault) ашиглах нь хэзээ хэзээнээс илүү чухал болж байна.

Эх сурвалж: The Hacker News, Cursor Security Notice, OpenSourceMalware Research, StepSecurity Advisory.