Дата төвөөс 300 TiB санах ой чөлөөлж, C++-ийг Rust рүү хөрвүүлсэн нь: Google "Gemini 4 Argon" моделио зарлалаа

Хиймэл оюуны салбарын өрсөлдөөн хөгжүүлэгчийн бичсэн жижиг функцийн кодыг автоматаар гүйцээх түвшнээс хэдийнэ хальж, томоохон системүүдийн архитектур, дэд бүтцийн түвшний даалгавруудыг бие даан шийдвэрлэх агент хэлбэр рүү бүрэн шилжээд байна. Энэхүү өрсөлдөөний шинэ шат болгож Google компани хамгийн сүүлийн үеийн фронтиер модел болох Gemini 4 Argon-ийг албан ёсоор зарлалаа.

Argon нь энгийн асуулт хариулт гэхээс илүү бодит ертөнцийн программ хангамжийн инженерчлэл (Software Engineering), кибер хамгаалалт болон олон шатлалт, урт хугацааны нарийн төвөгтэй ажлын урсгалуудыг (long-horizon workflows) найдвартай гүйцэтгэх зориулалттайгаар анхнаасаа бүтээгджээ.

Google-ийн дата төвөөс 300 TiB RAM-ийг бие даан чөлөөлсөн нь

Google энэ удаад шинэ моделио зөвхөн хийсвэр бенчмарк тестүүдээр сурталчлахын оронд өөрсдийн үйлдвэрлэлийн (production) системүүд дээр туршсан бодит кейсүүдээ хуваалцсан нь инженерийн нийгэмлэгийн анхаарлыг хамгийн ихээр татаж байна.

Argon дээр суурилсан AI агентууд Google-ийн нийт дата төвүүдийн хэмжээнд ажиллаж буй миллион сая үйлдлийн профайлингийн телеметр өгөгдлийг (fleet-wide profiling telemetry) өөрсдөө шинжилсэн байна. Улмаар санах ойн хуваарилалтын (memory allocation) гацаа, үр ашиггүй байдлуудыг бие даан илрүүлж, оновчлолын кодуудыг автоматаар бэлтгэн нэвтрүүлжээ.

Үүний үр дүнд эхний ээлжинд Google-ийн дэд бүтцээс 300 TiB гаруй физик RAM-ийг чөлөөлсөн бөгөөд бүрэн хэрэгжиж дуусахад 500 TiB-аас 1 PiB хүртэлх санах ойг хэмнэх тооцоо гарчээ. Энэ нь инженерийн багуудын олон сар зарцуулах байсан профайлинг болон архитектурын шинжилгээг хиймэл оюун бие даан хийсэн томоохон жишээ болов.

C/C++ сангуудыг Rust рүү хөрвүүлэх 800K мөр кодын миграци

Санах ойн аюулгүй байдал (memory safety) нь өнөөгийн системүүдийн хамгийн эмзэг асуудлуудын нэг хэвээр байгаа. Google компани өөрийн монорепо дахь эгзэгтэй C/C++ системүүдийг аюулгүй Rust хэл рүү шилжүүлэх асар том миграцийг Argon агентуудад даалгасан байна.

• libgav1 (Нээлттэй эхийн видео декодер): Тус декодерын хуучин Rust порт дахь 32,000 мөр SIMD кодыг Argon олон үе шаттай туршилт хийж (profile-guided experiments), хөрвүүлэгчийн (compiler) ассамблей гаралтыг судалсны үндсэн дээр шинэчлэн бичжээ. Ингэснээр компилятор өөрөө автоматаар векторизаци хийх боломжтой Safe Rust код үүсгэсэн бөгөөд өмнөх хувилбараасаа 2.7 дахин хурдан ажиллаж, өндөр оновчлолтой C++-ийн хурдад хүрсэн байна.
• Fuchsia Zircon Kernel: 800,000 гаруй мөр код бүхий Fuchsia үйлдлийн системийн Zircon цөм болон re2 зэрэг суурь сангуудыг Rust рүү шилжүүлэх ажлыг эдгээр агентууд гүйцэтгэж эхэлжээ. Ийм эгзэгтэй кодууд шууд production-д орохгүй бөгөөд эмуляци тест, автомат аудитын системүүд болон ахлах инженерүүдийн нарийн шалгуураар баталгаажиж байгаа аж.

Мөн квант тооцооллын чиглэлээр Argon нь квант алгоритмын subroutines-ийн spacetime нөөцийг (qubits × gates) оновчилж, өмнө нийтлэгдсэн шинжлэх ухааны суурь түвшний үзүүлэлтийг хэдхэн минутын дотор 40%-иар давуулсан байна.

1 сая гаралтын токен: Шинэ парадигм

Өмнөх ихэнх фронтиер загварууд гаралтын хязгаартаа (output token limit) баригдаж, код бичих үед логик нь тасрах эсвэл хариулт нь дутуу гардаг сул талтай байсан. Gemini 4 Argon нь гаралтын хязгаараа 1 сая токен (1M output tokens) болгон огцом нэмэгдүүлжээ (өмнөх загваруудад энэ нь ихэвчлэн 64K байсан).

Энэ нь модельд ямар ч саадгүйгээр нэг коммандаар асар том архитектурын төлөвлөгөө боловсруулах, хэдэн арван файл бүхий системийн кодуудыг нэг траектороор алдаагүй үйлдвэрлэх боломжийг олгож байна.

Программ хангамжийн бодит түвшний DeepSWE v1.1 бенчмарк дээр Argon 77.9% амжилт үзүүлж, салбартаа хамгийн өндөр үзүүлэлтийг тогтоожээ. Түүнчлэн гадны үнэлгээний багуудын мэдээлснээр моделийн худал мэдээлэл зохиох (hallucination) хувь ердөө 15% буюу одоо байгаа өрсөлдөгчдөөсөө эрс бага түвшинд хүрчээ.

Үнэ ба хүртээмж

Google шинэ загварынхаа үнийн бодлогыг хөгжүүлэгчдэд нэн таатайгаар танилцууллаа:

• Input tokens: 1 сая токен тутамд $2
• Output tokens: 1 сая токен тутамд $10
• Prompt Caching: Кэшлэгдсэн оролтын токенд 95%-ийн хөнгөлөлт олгох бөгөөд 1 сая кэшлэгдсэн токен нь ердөө $0.10 болж байна.

Энэ нь OpenAI-ийн GPT-6 цуврал загваруудтай харьцуулахад даалгавар гүйцэтгэх зардлыг ойролцоогоор 60 хувиар хямдруулж байгаа юм.

Аюулгүй байдлын үүднээс Gemini 4 Argon-ийг одоогоор Google-ийн Fairwind Program-д хамрагдсан кибер хамгаалалтын түншүүдэд эхлэн нээгээд байгаа бөгөөд ойрын хугацаанд Gemini API болон enterprise хөгжүүлэгчдэд нийтэд нь нээнэ гэдгээ мэдэгдээд байна. Системийн суурь архитектурыг автоматаар өөрчлөх чадвартай AI агентуудын эрин үе хэдийнэ эхэлжээ.

---

Эх сурвалж: Google Blog (Gemini 4 Argon: our next era of frontier intelligence), Google DeepMind Research Evaluation.