AI агентуудад зориулсан "хувийн интернэт": Google нээлттэй эх бүхий "Agent Mesh" сүлжээний дэд бүтцийг танилцууллаа

Сүүлийн үед хиймэл оюун ухааны хөгжүүлэлт ганц чатбот загвараас хальж, тодорхой үүрэг даалгаврыг бие даан гүйцэтгэх чадвартай AI Agent болон олон агентын хамтын ажиллагаа (Multi-Agent Systems) руу эрчимтэй шилжиж байна. Хөгжүүлэгчийн зөөврийн компьютер дээр ажиллаж буй кодлогч агент, CI/CD сервер дээрх код хянагч агент, компанийн дотоод өгөгдлийн сангийн дэргэдэх RAG агент гээд олон агент хамтран ажиллах шаардлага бодит амьдрал дээр байнга тулгардаг.

Гэвч эдгээр агентууд өөр өөр дэд бүтэц, VPC, firewall болон NAT-ийн цаана байрлах үед хооронд нь хэрхэн холбох вэ? Түүхий портууд нээж, нийтийн интернэтээр токен дамжуулах нь аюулгүй байдлын асар том эрсдэл дагуулдаг.

Энэхүү хүндрэлийг шийдвэрлэх зорилгоор Google нээлттэй эх бүхий Agent Mesh (анхны нэршил нь Sovereign Agent Mesh - SAM) төслөө зарлаж, хөгжүүлэгчдэд нээлттэй болголоо. Энэ нь AI агентуудад зориулсан бүрэн шифрлэгдсэн, төвлөрсөн бус Zero-Trust Private Network буюу агентын үйлчилгээний сүлжээний (Service Mesh) шинэ давхарга юм.

Agent Mesh гэж юу вэ?

Хэрэв бид микросервисүүдийн ертөнцөд серверийн хоорондын харилцаа, аюулгүй байдлыг зохицуулахын тулд Istio эсвэл Linkerd зэрэг Service Mesh ашигладаг байсан бол Agent Mesh нь үүнтэй яг ижил ойлголтыг AI агентуудад зориулан хэрэгжүүлсэн хувилбар юм.

Agent Mesh-ийн зангилаа (agentmesh-node) нь агент ажиллаж буй машин дээр хамт (sidecar байдлаар) ажиллаж, дараах үндсэн гурван боломжийг олгодог:

Үйлчилгээ, хэрэгсэл зарлах (Publish): Тухайн машин дээрх MCP (Model Context Protocol) хэрэгслүүд болон локал ажиллаж буй моделиудыг сүлжээнд аюулгүй бүртгэх.
Нээлт ба дуудалт (Discover & Call): Сүлжээн дэх бусад зангилаанууд ямар боломж санал болгож буйг хайж олон, тэдгээрийг алсаас дуудах.
Криптограф таних тэмдэг (Identity): Сүлжээний бүх оролцогчид төв серверээс хамааралгүйгээр бие биенийхээ эрхийг офлайн байдлаар шалгаж баталгаажуулах криптограф таних тэмдэгтэй болох.

Архитектурын гол онцлогууд

Agent Mesh-ийн ард Go хэл, libp2p, Protocol Buffers болон криптограф эрхийн систем ажиллаж байна. Систем нь гурван үндсэн зарчим дээр тулгуурладаг:

1. "Default-аар юу ч нээлттэй биш" (Zero-Trust)

Сүлжээнд нэгдсэн л бол бүх зүйлд хандана гэсэн ойлголт байхгүй. Сервисүүд өөрийн тохиргоондоо ил тод заагаагүй бол гадны ямар ч зангилаа түүн рүү холбогдох боломжгүй. Хамгийн чухал нь хандалтын дүрмүүд нь IP хаяг дээр биш, харин үйлчилгээний нэр (service names) болон криптограф эрх дээр тулгуурлан бодогддог.

2. Biscuit Token ба Офлайн баталгаажуулалт

Хуучны хэврэг JWT эсвэл API түлхүүрүүдийн оронд Agent Mesh нь Biscuit tokens технологийг ашигладаг. Захиалагч тал OpenID Connect (OIDC) эсвэл bootstrap токеноор Mesh Control Plane-д бүртгүүлэхэд түүнд өөрийнх нь хувийн түлхүүрт (private key) уягдсан Biscuit эрхийн бичиг олгогдоно. Biscuit нь Datalog суурьтай тул дуудалт хүлээн авч буй нөгөө талын зангилаа нь төв сервер рүү асуулга явуулахгүйгээр (zero network roundtrip) тухайн агентын эрхийг офлайн горимд шууд математик аргаар шалгах боломжтой. Мөн агентууд өөрийн эрхээсээ тодорхой хязгаарлагдмал дэд эрхийг (attenuation) бусад туслах агентуудад аюулгүй шилжүүлэх чадвартай.

3. NAT Traversal ба P2P холболт

libp2p технологийн тусламжтайгаар зөөврийн компьютер, гэр эсвэл оффисын firewall-ийн цаана байгаа төхөөрөмжүүд хоорондоо шууд P2P (Peer-to-Peer) холбогдож чадна. Хэрэв NAT хэт хатуу тохиргоотой байвал Mesh Router автоматаар шифрлэгдсэн relay үүрэг гүйцэтгэж өгөгдлийг дамжуулна.

MCP болон бусад протоколуудтай нийцэх байдал

Хөгжүүлэгчдэд хамгийн таатай мэдээ бол шинэ протокол сурах эсвэл коддоо том өөрчлөлт оруулах шаардлагагүй юм. Agent Mesh нь одоо байгаа экосистемтэй шууд интеграцчилагддаг:

Model Context Protocol (MCP): Хэрэв та өөрийн машиндаа өгөгдлийн сантай харьцдаг MCP сервер ажиллуулж байгаа бол Agent Mesh-ээр дамжуулан үүнийгээ бусад сервер дээрх агентуудад нэг ч порт нээлгүйгээр хуваалцах боломжтой. Тэд 127.0.0.1:8080/mcp гэсэн локал хаягаар алсын хэрэгслийг өөрийн мэт дуудна.
OpenAI-Compatible Inference Endpoint: Хэрэв нэг зангилаа нь хүчирхэг GPU дээр vLLM эсвэл Ollama ажиллуулж байвал сүлжээн дэх бусад хөнгөн агентууд ердийн OpenAI API-ийн дуудлага хийхэд л сүлжээ түүнийг автоматаар загвар байрлаж буй сервер рүү чиглүүлнэ.
Agent-to-Agent (A2A): Агентууд даалгаврыг бие биедээ шилжүүлэх (delegation) стандарт картуудыг солилцох суурь тохиргоо бүрэн хийгдсэн.

Хөгжүүлэгчид хэрхэн туршиж үзэх вэ?

Agent Mesh-ийг туршиж үзэх процесс тун хялбар. Бинар файлыг татаж аваад ердөө 3 тушаалаар туршилтын сүлжээнд нэгдэж болно:

# Суулгах
curl -sL https://google.github.io/agentmesh/install.sh | bash

# Олон нийтийн туршилтын сүлжээнд нэгдэх
agentmesh-node join https://bananas.sam-mesh.dev

# Дэд процессыг эхлүүлж, MCP серверийг идэвхжүүлэх
agentmesh-node run --daemonize

Үүний дараа таны машин дээр ажиллаж буй ямар ч агент (Cursor, Claude Code, өөрийн бичсэн LangChain агент г.м.) энэхүү mesh сүлжээгээр дамжуулан бусад төхөөрөмж дээрх хэрэгслүүдийг дуудаж чадна. Мөн өөрийн байгууллагын хувийн Control Plane-ийг нэг тушаалаар асаах боломжтой.

Дүгнэлт: Тархмал AI системийн шинэ үе

Өмнө нь бид агентуудын "тархи" буюу том хэлний загваруудын чадварт л анхаарч байсан бол одоо тэдгээрийн харилцаа холбоо, аюулгүй дэд бүтэц хамгийн чухал асуудал болж байна. Google-ийн Agent Mesh нь агентуудыг тусгаарлагдсан хайрцгаас гаргаж, аюулгүй байдал болон эрхийн удирдлагыг архитектурын түвшинд шийдсэн томоохон алхам боллоо. Цаашид олон агентаас бүрдсэн энтерпрайз систем бүтээх гэж буй багуудад Agent Mesh нь анхааралтай судлах ёстой нэн чухал дэд бүтэц байх нь тодорхой байна.

Эх сурвалж: GitHub - google/agentmesh