Агентуудад зориулсан "OAuth": Meta, Stripe, Shopify хамтран Personal Agent Protocol (PAP) стандартыг зарлалаа

Хиймэл оюуны бие даасан агентууд (AI Agents) кодыг бичиж, төлөвлөгөө гаргаж чаддаг болсон ч бодит ертөнц дэх хамгийн том саадтай тулгараад байсан нь вэб системүүдтэй харилцах явдал байв. Хэрэглэгч өөрийн агентад "Онлайн дэлгүүрээс миний өмсдөг хэмжээтэй пүүз захиалчих", эсвэл "Эмнэлгийн цаг товлоод өгөөч" гэж даалгахад агент тухайн вэбийн HTML-ийг scrap хийх, эсвэл дэлгэцийн screenshot авч mouse/keyboard дуурайлган ажиллахаас өөр аргагүй байсан билээ.

Гэвч энэ арга нь нэг талаас найдваргүй, удаан бөгөөд зардал өндөртэй. Нөгөө талаас Cloudflare, CAPTCHA зэрэг bot-оос хамгаалах системүүд хууль ёсны агентыг хортой crawler эсвэл халдлагаас ялгаж чадалгүй блоколдог. Үүнээс ч илүү ноцтой нь хэрэглэгч өөрийн нууц үг, картны мэдээллээ агентад тэр чигээр нь өгөхөөс өөр сонголтгүй байв.

Энэхүү эмх замбараагүй байдлыг цэглэхээр Meta болон Sierra компаниуд санаачлан Stripe, Shopify, Walmart, Genesys, Rocket зэрэг салбарын акулуудтай хамтран Personal Agent Protocol (PAP) хэмээх шинэ нээлттэй стандартыг албан ёсоор зарлалаа.

PAP гэж юу вэ? Яагаад энэ "OAuth"-ийн дараагийн хувьсгал гэгдэж байна вэ?

2000-аад оны сүүлээр хэрэглэгчид шинэ сайт болгонд тусдаа нууц үг үүсгэхээс сэргийлж, вэбэд "Sign in with Google" эсвэл "Sign in with Facebook" товчлуурыг авчирсан OAuth протокол ямар том өөрчлөлт авчирсныг та санаж байгаа байх.

Sierra-г үүсгэн байгуулагч бөгөөд OpenAI-ийн ТУЗ-ийн дарга Брет Тейлор (хуучнаар Facebook-ийн CTO байхдаа анхны сошиал нэвтрэлтийн системийг удирдаж байсан) PAP-ийг чухам энэ логиктой зүйрлэжээ. Тэрээр: "Нэгдсэн стандарт байхгүй үед вэб бүхэлдээ эмх замбараагүй болдог. Компаниуд өөрсдийн сайт руу хандаж буй урсгал нь бодит үйлчлүүлэгчийн итгэмжлэгдсэн агент уу, эсвэл халдагч бот уу гэдгийг тодорхойлох боломжгүй байна" хэмээн онцолсон юм.

Meta Superintelligence Labs-ийн инженерийн дэд ерөнхийлөгч Дэвид Синглтон мөн уг шийдлийг цахим шуудангийн SMTP протоколтой жишиж, хувийн агентууд дурын бизнесийн системтэй аюулгүй харилцах бүх нийтийн хэл болно гэж тодорхойлов.

Архитектурын бүтэц: PAP хэрхэн ажиллах вэ?

PAP нь агентуудад хязгааргүй эрх олгохын оронд тусгай дүрэм, эрхийн хязгаарлалт (scoped access) бүхий дараах 3 гол тулгууртай:

1. Зэрэглэл бүхий нэвтрэлт ба OAuth Delegation

Агент бизнесийн сайт эсвэл систем рүү хандахдаа шууд хувийн мэдээлэл шаардахгүй.

Зочин горим (Guest Session): Эхлээд агент нэвтрэлгүйгээр зочны эрхээр барааны каталог, үнэ, үлдэгдэл, буцаалтын нөхцөл гэх мэт нээлттэй мэдээллийг хурдан уншина.
Баталгаажуулалт ба Scoped Token: Хэрэглэгч захиалга өгөх, цаг товлох зэрэг бодит үйлдэл хийхийг зөвшөөрсөн үед л хэрэглэгч өөрийн эрхээр баталгаажуулж, агентад тухайн үйлдлийг гүйцэтгэх түр зуурын, зөвхөн заасан хязгаартай (жишээ нь, "зөвхөн сагсанд нэмэх", "50 доллараас хэтрэхгүй худалдан авалт хийх") token олгоно.

2. DOM Scraping-ийг халах: API болон MCP интеграц

Орчин үеийн агентууд вэб хуудсыг хүн шиг нүдээр харж, товчлуур дарах гэж оролдох нь (Computer Use) алдаа маш их гаргадаг бөгөөд асар их тооцооллын зардал үүсгэдэг.

PAP нь бизнесүүдэд сонголт олгож байна:

Хэрэв хүсвэл тухайн байгууллага өөрийн бүтээгдэхүүн, үйлчилгээгээ OpenAPI эсвэл Anthropic-ийн түгээмэл болгосон Model Context Protocol (MCP) стандартаар дамжуулан агенттай шууд structural JSON хэлбэрээр холбож өгнө.
Мөн компаниуд өөрсдийн бүтээсэн Enterprise агенттай хэрэглэгчийн хувийн агентыг хооронд нь холбож, Agent-to-Agent (A2A) харилцаа үүсгэх замыг нээж өгөх юм.

3. Бизнесүүдэд зориулсан хяналт ба баталгаажуулалт

Хамгийн гол нь компаниуд өөрсдийн сервер дээр ирж буй хүсэлтийг ямар агент, хэний өмнөөс хийж байгааг бүрэн харах боломжтой болно. Ингэснээр хэрэгцээгүй bot халдлагуудыг хаахын зэрэгцээ, бодит худалдан авагчийн агентуудад ногоон гэрлээр үйлчлэх боломж бүрдэнэ.

Программ хөгжүүлэгчдэд энэ нь юу гэсэн үг вэ?

Хэрэв та цахим худалдаа, SaaS эсвэл аливаа хэрэглэгчийн үйлчилгээний систем хөгжүүлдэг бол энэхүү шинэ эргэлтэд бэлтгэх цаг иржээ.

Shopify ба Stripe-ийн дэмжлэг: Энэхүү эвсэлд Shopify болон Stripe шууд нэгдсэн тул удахгүй Shopify платформ дээрх сая сая дэлгүүрүүд болон Stripe Link ашигладаг системүүд PAP протоколыг natively дэмжихээр төлөвлөгдөж байна. Энэ нь таны хийсэн онлайн дэлгүүрт хэрэглэгчийн Meta Muse зэрэг дурын агент орж ирээд худалдан авалт хийхэд бэлэн болно гэсэн үг.
Frontend-ээс API руу чиглэх өөрчлөлт: Хөгжүүлэгчид зөвхөн хүнд зориулсан UI гаргаад зогсохгүй, агентуудад зориулсан цэвэр data endpoint болон authorization scope гаргаж өгөх нь шинэ нормаль болно.
v0.1 тодорхойлолт тун удахгүй: Sierra болон Meta хамтран Personal Agent Protocol-ийн анхны v0.1 specification болон жишиг хэрэгжүүлэлтүүдийг (reference implementation) энэ 10-р сард багтаан олон нийтэд нээлттэй нийтлэхээ мэдэгдээд байна.

Дүгнэлт

Хиймэл оюун нь зөвхөн мэдээлэл хайж, текст боловсруулдаг туслахын түвшнээс хальж, бодит эдийн засгийн гүйлгээ хийдэг төлөөлөгч болон хувирч байна. Нээлттэй веб дээр агентуудын аюулгүй байдал, хандалтын хяналтыг нэгтгэх энэхүү Personal Agent Protocol нь ирээдүйн интернэтийн дэд бүтцийн хамгийн чухал тулгуур багануудын нэг болох нь тодорхой харагдаж байна.

Эх сурвалж:

Sierra Official Blog: "Introducing Personal Agent Protocol"
CNBC & Quartz: "Meta, Walmart, Stripe launch open standard for AI agents"
The Next Web (TNW): "Sierra announces Personal Agent Protocol, an open standard for personal AI agents"