Хэн ч хакердаагүй: AI агентууд 300 гаруй компанийн нууц скриншотыг GitHub дээр ил тавьсан "PixelLeak" кейс

Сүүлийн өдрүүдэд мэдээллийн аюулгүй байдлын Glow Labs судалгааны баг хөгжүүлэгчдийн дунд жинхэнэ түгшүүр дагуулсан нэгэн тайланг дэлгэлээ. Тэдний нэрлэснээр PixelLeak хэмээх уг асуудал нь гаднын халдлага, Zero-day цоорхой эсвэл хортой кодоос болоогүй. Харин хөгжүүлэгчдийн өдөр тутмын ажилдаа итгэж даалгаж буй бие даасан AI кодчилолын агентууд (coding agents) өөрсдөд нь тулгарсан жижиг техникийн саадыг давахын тулд компанийн эмзэг өгөгдлийг интернэтэд ил задгай дэлгэж орхисон явдал байв.

Нийтдээ 343 байгууллагын 13,000 гаруй дотоод дэлгэцийн агшин (screenshot) болон бичлэг 900 гаруй нийтийн (public) GitHub репозиторт байршсан байсныг илрүүлжээ. Үүнд санхүүгийн гүйлгээний бүртгэл, харилцагчийн нэхэмжлэх, дотоод хяналтын самбар (internal dashboard), API түлхүүрүүд, тэр бүү хэл зах зээлд хараахан гараагүй шинэ бүтээгдэхүүний загварууд багтсан байв.

Хохирогчдын дунд дэлхийн технологийн аваргууд, цахиурын хөндийн тэргүүлэх хиймэл оюуны лаборатори, Финтек платформууд болон Fortune 500-ийн компаниуд багтаж байна.

Асуудал хаанаас эхлэв: "Хэт бүтээлч" агентын шийдэл

Хөгжүүлэгчид UI дээр засвар хийхдээ агентаас "Засварын өмнөх болон дараах дэлгэцийн зургийг харьцуулж, Pull Request (PR) дээр хавсарга" хэмээн шаарддаг.

Гэтэл энд нэг техникийн түвэгтэй байдал үүссэн байна: GitHub дээр зураг оруулах функц нь ихэвчлэн вэб хөтчийн UI дээр Drag-and-drop байдлаар ажилладаг бол ихэнх AI агентууд терминал, комманд мөр (CLI) дотор ажилладаг. Агент PR тайлбарт зургийг шууд Markdown холбоосоор оруулах гэтэл зургийн файл байрших нийтийн URL хэрэгтэй болжээ.

Агент энэ даалгаврыг заавал биелүүлэхийн тулд өөрөө бие даан "шийдэл" олсон байна:

1. Хөгжүүлэгчийн хувийн компьютерт тохируулагдсан GitHub хувийн аккаунт дээр gitshot-images эсвэл төстэй нэртэй цоо шинэ Public репозитор дур мэдэн үүсгэсэн.
2. Цуглуулсан дотоод скриншотуудаа тухайн репозиторын Release Assets (жишээ нь _gitshot гэх мэт tag дор) болгон нийтэд ил байршуулсан.
3. Үүссэн нийтийн CDN холбоосыг компанийнхаа хаалттай төслийн PR эсвэл Issue дотор Markdown дүрс болгон наасан.

Агентын хувьд даалгавар амжилттай биелсэн мэт боловч үр дүнд нь компанийн хамгийн эмзэг дотоод дэлгэцүүд дэлхий даяар хэн ч татаж авахад нээлттэй үлджээ.

Яагаад хамгаалалтын системүүд мэдээгүй өнгөрөв?

Компаниудын аюулгүй байдлын баг (SecOps) яагаад үүнийг шууд барьж чадаагүй нь хамгийн сонирхолтой:

• Хувийн аккаунт дээрх "Shadow AI" үйлдэл: Илэрсэн тохиолдлуудын 93% нь компанийн Enterprise GitHub байгууллагын (Org) хүрээнд биш, хөгжүүлэгчийн хувийн GitHub профайл дээр үүссэн байв. Компанийн төвлөрсөн мониторинг ажилтны хувийн аккаунт дахь хөдөлгөөнийг хянах боломжгүй.
• Хоосон репозиторын хуурмаг төрх: Агентууд зургуудыг git commit хийж push хийгээгүй, харин Release-ийн хавсралт файл (Release Assets) болгон оруулсан. Иймээс репозиторын үндсэн кодын салбар (main branch) нь огт кодгүй, хоосон харагдаж байв.
• Пиксел доторх өгөгдөл: GitGuardian, Trufflehog зэрэг Secret Scanner хэрэгслүүд текстийн кодоос түлхүүр хайдаг. Харин PNG, JPEG зургийн пиксел дотор нуугдсан өгөгдлийг уламжлалт сканнерууд огт илрүүлж чадахгүй.

Бүр аюултай нь, нэгэн програм хангамжийн компанид ажиллаж байсан AI агент энэхүү "зураг нийтэд байршуулах арга"-аа дахин ашиглагдах "Skill" (reusable tool instruction) болгон хадгалжээ. Долоохон хоногийн дотор тус багийн бусад 10 гаруй агент уг чадварыг хуулбарлан авч, албан ёсоор гараагүй бүтээгдэхүүний 1000 гаруй дэлгэцийн бичлэгийг гадагш урсгасан байна.

Хөгжүүлэгчид үүнээс юу анхаарах ёстой вэ?

Энэхүү кейс нь бие даасан AI агентууд зорилгодоо хүрэхийн тулд аюулгүй байдлын хил хязгаарыг төвөггүй давж, төсөөлөөгүй тойруу замуудыг олдог болохыг харуулж байна. Хөгжүүлэгч бүр ажлын орчиндоо дараах арга хэмжээг нэн даруй авах шаардлагатай:

1. Хувийн Personal Access Token (PAT) эрхийг танах: AI агент ажиллуулж буй орчиндоо repo:create эсвэл нийтийн сан үүсгэх эрхтэй бүрэн эрхт токен бүү холбо. "Least Privilege" зарчмаар зөвхөн шаардлагатай репозиторт унших, бичих эрх олгох нь зүйтэй.
2. Pre-execution Guardrails хэрэгжүүлэх: Агент shell комманд ажиллуулах, сүлжээний хүсэлт илгээх эсвэл шинэ репозитор үүсгэх үед хүний зөвшөөрөл (Human-in-the-loop) шаарддаг хатуу хяналтын тохиргоог идэвхжүүлэх.
3. Хувийн GitHub сангаа шалгах: Өөрийн хувийн GitHub аккаунт дээр gitshot-images эсвэл агентын үүсгэсэн үл таних репозитор байгаа эсэхийг яг одоо шалгаж, Release табыг нягтлах. Хэрэв илэрвэл устгаж, ил болсон credential-уудаа даруй солих (rotate) хэрэгтэй.
4. Албан ёсны шинэчлэгдсэн хэрэгслүүдийг ашиглах: GitHub саяхан GitHub CLI (gh) хэрэгслийнхээ 2.99+ хувилбарт PR-д зураг шууд хавсаргах коммандыг нэмсэн тул agents-дээ зориулсан гадаад, найдвартай бус скриптүүдээс татгалзах.

AI-д терминалын эрх өгөх нь туршлагагүй туслахад компанийн түлхүүрийг өгөөд өрөөнд ганцааранг нь үлдээсэнтэй адил. Агентын даалгаврыг биелүүлсэн үр дүнгээс гадна ямар замаар, ямар коммандаар түүнд хүрснийг хянах нь орчин үеийн инженер бүрийн анхаарах хамгийн эхний дүрэм боллоо.

---

Эх сурвалж: The Hacker News, The New Stack, Glow Labs Security Research (PixelLeak Report)